அபிராமி அந்தாதி - 28

                                                               அபிராமி அந்தாதி - 28   
                                                                                                      

                                                     

சொல்லும் பொருளும் என, நடம் ஆடும் துணைவருடன்

புல்லும் பரிமளப் பூங்கொடியே! நின் புதுமலர்த் தாள்

அல்லும் பகலும் தொழுமவர்க்கே அழியா அரசும்

செல்லும் தவநெறியும், சிவலோகமும் சித்திக்குமே 

அன்பர் தொகுத்து அளித்துள்ள விளக்கவுரை... நன்றிகள் பல 

சொல்லும் பொருளும் என, நடம் ஆடும் துணைவருடன்

சொல் - என்பது முதலில் வருவது - சக்தியைக் குறிக்கும்.பொருள் - என்பது சொல்லைக் கேட்ட பிறகு விளங்குவது - சிவன்.பொருளின்றி ஏதேனும் ஒரு சொல் இருக்க முடியுமா? இல்லை அல்லவா? அது போல், ஒரு பொருள் பற்றிப் பேச வேண்டுமானால், ஏதேனும் ஒரு சொல் சொல்லித்தானே ஆக வேண்டும்? அப்படி, சொல்லும், பொருளும், இரண்டறக் கலந்தவை. அப்படித்தான், இறைவனும், இறைவியும் கலந்திருப்பதாகப் பேசுகிறர் பட்டர்.

லலிதா ஸஹஸ்ரநாமத்திலயும் அன்னையை
வாகதீச்வரீ - வாக்குகளிற்கு அதிபதியானவள் வசினீ முதலிய எட்டு வாக்தேவதைகளுக்கும் ஈசுவரியானவள். இவர்கள், அம்பாளின் ஆக்ஞைப்படியே ( இந்த) ஸ்ரீ லலிதா ஸஹஸ்ரநாம ஸ்தோத்ரத்தை எழுதினார்கள். எல்லா விதமான வார்த்தைகளும் எழுத்துக்களும் அம்பாளுடையதே என்று ஸௌந்தர்யலஹரீயில் பகவத்பாதாள் கூறியுள்ளார்கள்.

சிவ பெருமான் நர்த்தனம் செய்தபோது, முதலில், சப்தங்கள் எழுந்தன என்று சொல்வார்கள்.

அந்தச் சொற்களே பின்னர் வேதங்களாக விளங்கின என்று சொல்வதும் உண்டு. சொல்லையோ அதன் பொருளையோ பிரிக்க முடியாது. அதுபோல இந்த அர்த நாரீஸ்வரத் திருக் கோலத்தை பாடுகிறார் பட்டர்.

ஸ்ரீ லலிதா ஸஹஸ்ரநாமம் -

நடேஸ்வரி - நடரேசருடைய மனைவி. சிதம்பரத்தில் ஆடும் நடராஜாவின் மனைவி. சிதம்பரம் என்பதை ஷேத்திரம் என்றும், ஹ்ருதயாகாசம் என்றும் இருவிதமாகப் பொருள் கொள்ளலாம். இரண்டுமே சரியானவை. அப்படி ஆடும் நடேசருக்கு அனுஸரணையாக இவளும் நடனம் ஆடுகிறவள்.

இவர்கள் இருவரும் நடனம் செய்வதை " தவாதாரே மூலே " ஸௌந்தர்யலஹரீயில் ( ஸ்லோகம் - 41) சொல்லப்படுகிறது.

புல்லும்

புல்லுதல் என்று ஒரு அருமையனா தமிழ் சொல் உண்டு. அணைத்தல், மருவுதல், தழுவுதல், புணர்தல் என்று தலைவனுக்கும் தலைவிக்கும் உள்ள நெருக்கத்தை புலப்படுத்தும் ஒரு சொல். வள்ளுவர் இந்த சொல்லை பல இடங்களில் பயன்படுத்தி இருக்கிறார்

அபிராமி, அவளுடைய துணைவனை அணைத்து இருக்கிறாள். அவளுடைய துணைவன் மீது அவளுக்கு அவ்வளவு அன்பு. நெருக்கம் என்றால் மிக நெருக்கம். பிரிக்க முடியாத நெருக்கம். அதை எப்படி சொல்லி விளங்க வைப்பது ?

ஒரு சொல்லும், அதன் பொருளும் எப்படி பிரிக்க முடியாதோ அப்படி ஒரு நெருக்கம். பொருள் இல்லாவிட்டால் சொல் இல்லை. சொல் இல்லாமல் பொருள் இல்லை. இரண்டும் வேறுதான் என்றாலும் ஒன்றை விட்டு ஒன்று இல்லை.

கணவன் மனைவிக்கு இடையே உள்ள உறவு, உள்ள ஒரு புரிதல் என்பது ஒரு அலுவகலத்தில் வேலை பார்க்கும் மற்றொரு நபருடன் உள்ள புரிதல் போல அல்ல.

ஒரே சொல் பல அர்த்தங்களை தரும்...

அறிவு பூர்வமாய் ஒரு அர்த்தம்

உணர்வு பூர்வமாய் ஒரு அர்த்தம்

சொல்லுபவரின் மன நிலையை கொண்டு ஒரு அர்த்தம்

சொல்லப் படும் இடத்தை கொண்டு ஒரு அர்த்தம்

என்று அர்த்தம் மாறுபடும். கணவனும் மனைவியும் ஒருவரை ஒருவர் புரிந்து கொண்டு அறிவு பூர்வமாய், உணர்வு பூர்வமாய், ஒருவரின் மனதை ஒருவர் அறிந்து கொண்டு...ஈருடல் ஒருயிராய் இருக்க வேண்டும்..அபிராமி அப்படி இருக்கிறாள்....

அதாவது அபிராம பட்டர்,இந்தப் பாடலில், பக்தி மார்க்கத்தையும் அதன் பயனையும் இந்த இரண்டு சொற்களினால் விளங்க வைத்து விட்டார். சக்தியின் மூலமாகத்தான் சிவனை ( சிவலோக பதவியை) அடைய முடியும். திருமூலரும், " மருவொத்த மங்கையும் தானும் ( திருமந்திரம் - 1137) என்பார்.அதாவது மலரோடு மணம் பொருந்தியிருப்பது போல சிவனும் சக்தியும் ஒன்றியிருப்பது.

இரகு வம்சத்தில் காளிதாசன் இப்படி சொல்றார்.

वागर्थाविव संपृक्तौ वागर्थप्रतिपत्तये।
जगतः पितरौ वन्दे पार्वतीपरमेश्वरौ॥

வாக³ர்தா²விவ ஸம்ப்ருʼக்தௌ வாக³ர்த²ப்ரதிபத்தயே|
ஜக³த​: பிதரௌ வந்தே³ பார்வதீபரமேஸ்²வரௌ||

சொல்லும் பொருளும் என இணைந்த தொல்லுலகின் தாய் தந்தையரை, பார்வதி பரமேஸ்வரரை, சொல்லையும் பொருளையும் அறிந்திடவேண்டிப் பணிகிறேன்னு சொல்றார்.

 பரிமளப் பூங்கொடியே!

பரிமளப் பூங்கொடியே. ( 631. திவ்ய கந்தாட்யா - தெய்வீக மணத்தால் நிறைந்தவள். ) நடராசப்பெருமானுடன் நின்று விளங்குவதால் ' அவளைப் பூங்கொடியே ' என்றார்.

நின் புதுமலர்த் தாள்

அவளுடய பாதங்கள்...மிகமிகமென்மையானவை...ஈரமானவை...மணம் வீசுபவை ....இப்படி சொல்லிக் கொண்டே போவதை விட ...அப்போது தான் மலர்ந்த மலர் போல் இருக்கும் அவளுடைய பாதங்கள்....

அல்லும் பகலும் தொழுமவர்க்கே

அப்படிப் பட்ட உன் பாதங்களை இரவென்றெண்ணாது, பகலென்றெண்ணாது எந்நேரமும் தொழுகின்ற அடியவர்களுக்கு....

என்னவெல்லாம் கிட்டும்?

அழியா அரசும் செல்லும் தவநெறியும், சிவலோகமும் சித்திக்குமே 

வேறென்ன கிட்டும்? செல்லும் தவநெறி.. எங்கே செல்வதற்கான தவநெறி.? இறப்புக்குப் பின்னான உலகு சொர்க்கமா? அல்லது நரகமா? என்பதைத் தீர்மானிப்பவை நாம் செய்யும் புண்ணிய பாவங்களே.. எனவே நல்லுலகமான சொர்க்கத்துக்குச் செல்வதற்குரிய அரும்பணியான தவநெறிகள் அன்னையைத் தொழுவோர்க்கு வந்து சேரும்.

வேறு? சிவலோகம்... அம்மையுடன் அப்பன் அருளாட்சி செய்யும் சிவலோகத்தில் வாழக்கூடிய வாய்ப்பு.. சிவலோக பதவியடைந்தார் என்று நாம் மரித்த பின்னர் நமது நினைவிடத்தில் கல்வெட்டில் எழுதிவைத்தால் மட்டும் சிவலோக பதவி நமக்குக் கிட்டிவிடுமா? இல்லவே இல்லை... அன்னையின் கருணை நமக்குக் கிட்டினால் மட்டுமே இது சாத்தியம் என்கிறார் அபிராமிப் பட்டர்..

ஸ்ரீ லலிதா ஸஹஸ்ரநாமத்திலயும்

சிவபரா - தன் பக்தர்களுக்கு சிவனைக் காண்பிப்பவள்னு சொல்லியிருக்கு.

பவதாவஸுதாவ்ருஷ்டி. பவதா + வஸுதா + வ்ருஷ்டி என்றும் பிரிக்கலாம். பவதா - சிவனை தருபவள். வஸுதா - செல்வங்களைத் தருபவள். அதாவது மோட்சத்தையும், போகத்தையும் அளிப்பவள்.

ராஜ்யதாயினீ - ராஜ்யத்தைக் கொடுப்பவள்.

ஸாம்ராஜ்யதாயினீ - ஸாம்ராஜ்யத்தைக் கொடுப்பவள்.

ராஜபீடநிவேசித நிஜாச்ரிதா - தன்னை அண்டியவர்களை அரசபீடத்தில் அமர்த்துபவள்.

இந்த அந்தாதில பட்டர் அடியாருக்கு என்ன என்னவெல்லாம் கிடைக்கும் என்று பட்டியல் போடுவதும்கூட மிக அழகாக இருக்கிறது. முதலில், நாம் வாழப், பொருள் வேண்டும். அந்தப் பொருள் வேண்டும் போகத்தின் எல்லை தான், ராஜ போகம். அந்த ராஜ போகத்தினையே தந்து விடுகிறாள் எம் அன்னை. பின்னர், போகம் கசந்து, மனம் இசைந்து, நல் வழிப்பட்டு, தவ நெறி தேடும்போதும், அருள்பவள் அந்த அன்னைதான். அந்தத் தவநெறியின் பயனேயாக, முக்தியினை, அந்தச் சிவத்தினை, நல்குவதும் கூட, எம் அன்னையே என்று அழகாக உணர்த்துகிறார் பட்டர்.                                                                                                                                          பொழிப்புரை

தூய்மையான சொல்லோடு இணைந்த பொருள் போல ஆனந்தக் கூத்தாடும், நடராஜப் பெருமானுடன் இணைந்து நிற்கும் மணம் வீசுகின்ற அழகிய பூங்கொடி போன்றவளே! அன்றலர்ந்த பரிமள மலரைப் போல உள்ள உன் திருவடிகளை இரவென்றும், பகலென்றும் பாரமால் தொழுகின்ற அடியார் கூட்டத்திற்கே என்றும் அழியாத அரச போகமும், நல்ல மோட்சத்திற்கான தவநெறியும், சிவபதமும் வாய்க்கும்




                                                                பாடலை குருஜி  கற்பிக்கிறார் இசையுடன்

                                                                                               

                                                          U Tube Link for ANDROID  and   I PAD   PHON

                                        https://youtu.be/-8oq2Rae4qk?t=3

                            

                                                                        அன்பர்கள் இசைக்கிறார்கள் 

                                                                                                       


                                                          U Tube Link for ANDROID  and   I PAD   PHONE 


                                      https://youtu.be/mFmYi4hrAjk?t=2 


                                              அபிராமி சரணம் சரணம்!!
                                                        முருகா சரணம்